APAY KABSAT?

Michael Asuten

I
Apay ti sangkalip-ak a namnama,
Naimot nga dumteng, pangalaan ti pigsa?
Apay nga nalap-it ti panirigan ti tao,
Isu kadi ti dagup ti kinapudno?

II
Apay ti tao nga agtarigagay agbalin a pagwadan,
Isu nga pagduduaan iti kaadwan?
Apay ti nasin-aw a kababalin ti tao,
Dangkuk ti ipaay ti pada na nga tao?

III
Apay nga ti natuok nga rugso ti kanito,
Isu nga kadawyan nga pagkapsutan ti tao?
Apay nga ti umadanin a gasat,
Ballikugen iti pay-od ti darikmat?

IV
Apay nga rumsua ti pannakaidadanes,
Nu ti aramid ket nalinay ti linteg?
Apay nga napnuan saem ti biag,
Nu kalikaguman ket balligi ken ragsak?

V
Apay ti pannakiranget iti tuok,
Masulnitan bassit a tan-ok?
Apay nga ti nasudi a tarigagay,
Makelga ket agturong iti liday?








VI
Apay nga agsukisok iti panunot,
Kadagiti pannakisalisal ti adu a parikut?
Apay nga ti puso ket di agparbeng,
Nga makarikna iti ut-ot ken saem?

VII
Apay nga ti tao naessem iti turay,
Imas, ragsak, sulisog ken nam-ay?
Awan kadi agrayu iti dayaw ken gundaway,
Sam-it ti isem, urnos ken saguday?

VIII
Ti didigra sumanggir iti saniweng ni basol,
Bulnos ket bisin, siba ken angol;
Apay nga baeten ti lapsat ni ayat,
Marnuuyan met ti asug ken rigat?

IX
Dagitoy kadi ti naimnas a balikas ti biag?
Tuok ken rigat ti kanayun a masagrap?
Saan kadi kabsat a napinpintas,
Nu ti bugas ti biag ket diro ti ragsak?

X
Mabalin nga dagitoy ket pannubok laeng,
Dana ti tao, mabalin nga naikeddeng;
Isu nga kasapulan tayo ti regget ken regta,
Kadwa ti namnama ken pammati Kenkuana.